O Xuvenil A xógase o pase á fase de ascenso a Liga Nacional

Previa de infarto en Cotogrande

O Xuvenil A da U.D. Santa Mariña xógase o pase á fase de ascenso a Liga Nacional e recibe ao Cented coas mesmas aspiracións.

Este sábado ás 18:00 horas, Cotogrande vivirá unha auténtica final. O Xuvenil A da U.D. Santa Mariña recibe ao Cented Academy de Ourense na última xornada de liga, nun duelo directo que decidirá cal dos dous equipos seguirá loitando polo soño do ascenso á Liga Nacional.

Ambos conxuntos chegan a esta cita cun obxectivo claro: os ourensáns con 57 puntos e os nosos rapaces con 55. O empate favorece ao Cented, que xa venceu na primeira volta por 2-0. Pero esta vez, xogan no noso campo, coa nosa xente, coa nosa forza.

O Santa Mariña leva tempadas pelexando por este momento. Sempre ás portas, sempre loitando ata o final. Esta campaña, o equipo mostrou carácter, calidade e ambición, e chega á última xornada con todo por decidir. Só vale gañar, e os xogadores saben que están ante unha oportunidade única para facer historia e devolver ao club á categoría que merece.

Chamamento á afección: facédevos sentir!

Desde o club queremos facer un chamamento a toda a familia vermella e azul. Este sábado, Cotogrande ten que rebentar! Precisamos que cada bancada, cada metro do campo, estea cheo de cor, de ánimo e de paixón.

Trae a bufanda, o tambor, a voz e as ganas. Axudemos aos nosos xuvenís a dar ese paso definitivo cara aos play offs. Cada berro conta. Cada aplauso empuxa. Cada un de vós é parte deste soño.

O sábado, ás 18:00, todos e todas a Cotogrande. Que se escoite en toda Galicia que o Santa Mariña está máis vivo ca nunca. Imos por ese ascenso!

SEMENTE VERMELLA !